1Th 5 | WSK | STEP | Aga singsang, ana tam gawa bo batagornak ale tom Kari Biya te tairukko, se mel tom mu te aratukko, mu ninga manornakko mena.

1 Thessalonians 5

Kari Biya tairukko ko sinar den

1 Aga singsang, ana tam gawa bo batagornak ale tom Kari Biya te tairukko, se mel tom mu te aratukko, mu ninga manornakko mena. 2 Mu awuk, nina ikisan, kariimet turom aniwasan se tere kari nunga kawam ningi utu naguso se maragasan biririkisan iwitata, Kari Biya ko Tom tairatela tai aratukko. 3 Se kariimet me ikia alo baluwomon, “Mel suen la kutek am se terong la,” ma baluwomon se, tairatela ikup memek nunga maguwurokko nongote aratukko. Mu imet kuriang iluwokko kumik yaman duap beteso iwitata, ikup tairatela nongote aratukko. Se nuna ikup mu kiamon ale me tagi tamonko. ^{▼▼1 Thes 5:1-3 Ana ikia sinar ago baganakko: Luke 17:26-30; 21:34-35; Rev 3:3. Kawel den balmonko: Jeremiah 6:14; Ezekiel 13:10.}

4 Bare aga singsang, nina mu tiromorom ningi mena. Se tom mu tere kari iwita tairuk se nina nguala sipa me biririkiralko. 5 Nina suen la nikim ko kariimet, se woremkalal ko kariimet. Nina se ana mu turom ko agi, tiromorom ko kariimet mena. 6 Umutang ko, ana saki alo nunga iwita me ani kuenakko, ana marak sinar ago baganakko. 7 Mu awuk, arikaya anisan mu turom anisan. Se arikaya yu nasan ngualasan mu turom nasan ngualasan.

8 Bare ana mu woremkalal ko kariimet, se sinar ago baganakko. Ale anananga nangamang ningi nunguning, se anananga nainimi ko kuera ko munan, mu kager ko guang aora mu iwita nagunakko. Ale nanga ikia Kaem nanga sangaru taukko ko aniso, mu nasupuling ko lakira iwita tugunakko. 9 Mu awuk, Kaem ana noko gomang magara aringinakko me nanga balam. Mena. Nu ana nanga Kari Biya Jesus Kristus te nanga sangaru taukko nanga balam. 10 Nu ana nago ko kueram, umutang te ana marak bagasan ta, kueman mu ta, ana nu ilak baganakko.

11 Buta se munan ningo aitak bitawasan suwutata, ninimi nengemang ira se ninimi sokel tui se bagaralko.

Kris alo te bagomonko munan den

12 Aga singsang, ana ninga manorsan, nina ninga Kris supuling alo ninga ningi Kari Biya ko ura ilu se, ikia ningo ningaru se nengerak bagasan, mu nobowa ningi bagaralko. 13 Nina nononga ura betesan wore ko ikial ale, ninguru nunga kua se, nunga sinar talko. Nengemang lila te ninimi ago bagaralko.

14 Aga singsang, ana iwita ninga manorsan: kariimet gagorsan mu nunga maonal se ura ilumonko. Ale kariimet nongomang ningi nguangara ago mu nongomang ira se sokel nungaralko. Ale kariimet nosokel mena mu nunga saongalko. Ale suen la arungu nengemang lila te bagaralko. 15 Bo ninga bita maguwurok, mu koma memek me tualko. Mena. Tom suen biya nina munan ningo ninimi te bita se kariimet saki alo te nunga beteralko sail tagiralko.

16 Tom suen biya amilmil ago bagaralko. 17 Pempem Kari Biya aru ngatanguru se bagaralko. 18 Ale anapeya nengete aratuk, bare tom suen biya Kaem amilmil tui se bagaralko. Nina Jesus Kristus ko kariimet uwutata beteralko Kaem gomang aniso.

19 Nina Korang Bur ko ura beteso mu me ko lage kaolalko. 20 Kariimet Kaem kuring tasan ale balsan mu nunga den me ari pateralko. 21 Bare den suen la ninguru tuteral arigal, ale yawarakala mu iluwalko. ^{▼▼1 Thes 5:19-22 Kaem kuring ta ale bala ko munan: 1 Cor 14:1, 39; Eph 4:30; 1 John 4:1.} 22 Ale munan memek suen la mu nibiring tualko.

Den nukum

23 Anananga nangamang Kaem, lila yawara ko duap, mu kota ninga sanguk se laili nunguningkiri bagaralko. Nu nenenga ningimik guang, ninga nedera, ninga ikia ko sinar tauk se, tom nanga Biya Jesus Kristus peleruk tairukko mu te, nina memek bo mena, yawarakala bagaralko. 24 Kari ninga aruso umutang mu nu butata bitirukko nunguning, se nina am ko nengemang ningi nunguning arukko.

25 Aga singsang, nina ana nago ko ngatangaralko.

26 Nina Kris alo suen la amilmil den ninimi tui se ninimi nigiting iluwalko. 27 Ani Kari Biya nup te ninga manorsam, nina tam gawa imi tal ale Kris alo suen la nunga ningi kaural se ikimonko.

Nanga Biya Jesus Kristus ko gomang lila mu nengerak bagurukko.

28